Komunikazzjoni mill-Kummissjoni dwar: “Is-sikurezza marittima: fil-qalba tat-tbaħħir nadif u modern”

Il-Kummissjoni qed tipproponi li tirrevedi ħames biċċiet ta’ leġiżlazzjoni biex timmodernizza r-regoli tal-UE dwar is-sikurezza u s-sostenibbiltà marittima u tipprovdi lill-UE b’għodod biex tappoġġa t-tbaħħir nadif u modern. L-għan huwa li jiġi żgurat li s-settur marittimu tal-UE jkun adattat għall-iskop tiegħu. Meħuda flimkien, dawn il-proposti huma l-pedament tal-isforzi biex jiġu żgurati traffiku u trasport marittimu effiċjenti, sostenibbli u sikur fl-ilmijiet tal-UE u lil hinn minnhom, għall-benefiċċju taċ-ċittadini, il-komunitajiet kostali, l-ambjent tal-baħar, u oċeani b’saħħithom. B’mod parallel ma’ dan il-qafas legali robust, l-UE hija impenjata li taħdem fi ħdan l-Organizzazzjoni Marittima Internazzjonali (OMI) biex tistabbilixxi l-limitu fuq kwistjonijiet ta’ sikurezza u sigurtà, id-diġitalizzazzjoni, u l-ekoloġizzazzjoni u d-dekarbonizzazzjoni tat-tbaħħir.