Ir-Regolament (UE) 2024/1991 dwar ir-restawr tan-natura

Il-liġi dwar ir-Restawr tan-Natura hija l-ewwel liġi komprensiva tat-tip tagħha mifruxa mal-kontinent kollu. Huwa element ewlieni tal-Istrateġija tal-UE għall-Bijodiversità, li tistabbilixxi miri vinkolanti għar-restawr tal-ekosistemi degradati, b’mod partikolari dawk bl-akbar potenzjal li jaqbdu u jaħżnu l-karbonju u li jipprevjenu u jnaqqsu l-impatt tad-diżastri naturali. Il-liġi għandha l-għan li tirrestawra l-ekosistemi, il-ħabitats u l-ispeċijiet madwar iż-żoni tal-art u tal-baħar tal-UE sabiex i) tippermetti l-irkupru fit-tul u sostnut tan-natura bijodiversa u reżiljenti, ii) tikkontribwixxi għall-kisba tal-objettivi tal-UE għall-mitigazzjoni tat-tibdil fil-klima u għall-adattament għat-tibdil fil-klima u iii) tissodisfa l-impenji internazzjonali.