L-implimentazzjoni tar-Regolament (UE) Nru 1379/2013 dwar l-organizzazzjoni komuni tas-swieq fil-prodotti tas-sajd u tal-akkwakultura

Dan ir-rapport jiddeskrivi l-implimentazzjoni u r-riżultati tar-Regolament dwar l-Organizzazzjoni Komuni tas-Suq (OKS), skont l-Artikolu 48 ta’ dak ir-Regolament. Ir-rapport isegwi l-istruttura tar-Regolament dwar l-OKS. Għal kull taqsima, ikopri dawn li ġejjin: rendikont tal-implimentazzjoni tad-dispożizzjonijiet tal-OKS u l-kontribut tagħhom għall-kisba tal-objettivi tal-Politika Komuni tas-Sajd (PKS); il-kisbiet ewlenin, b’mod partikolari dawk li jirriżultaw mir-riforma; l-isfidi u n-nuqqasijiet fl-implimentazzjoni tar-Regolament; u oqsma ta’ titjib taħt il-qafas legali attwali, jew barra, fejn strumenti oħra (aktar reċenti) jistgħu jindirizzaw b’mod aktar effettiv jew komplementari l-objettivi tal-OKS bħall-Patt Ekoloġiku tal-UE jew l-istrateġija “Mill-Għalqa sal-Platt”.