Komunikazzjoni mill-Kummissjoni: Dwar il-Politika Komuni tas-Sajd illum u għada: Patt għas-Sajd u l-Oċeani favur ġestjoni tas-sajd sostenibbli, ibbażata fuq ix-xjenza, innovattiva u inklużiva

L-għan ta’ din il-Komunikazzjoni huwa li tirrapporta dwar il-funzjonament tal-Politika Komuni tas-Sajd (PKS), kif previst fl-Artikolu 49 tar-Regolament dwar il-PKS, u li tistabbilixxi viżjoni u perkors lejn sajd sostenibbli u reżiljenti tal-futur. Dan jikkomplementa l-pjan ta’ azzjoni dwar il-protezzjoni u r-restawr tal-ekosistemi tal-baħar għal sajd sostenibbli u reżiljenti u l-Komunikazzjoni dwar it-Tranżizzjoni tal-Enerġija tas-settur tas-Sajd u tal-Akkwakultura tal-UE, li jidentifikaw u jipprijoritizzaw azzjonijiet konkreti meħtieġa biex jiġu indirizzati sfidi speċifiċi tas-sajd, ambjentali u klimatiċi. Barra minn hekk, rapport immirat jipprovdi valutazzjoni komprensiva tal-organizzazzjoni komuni tas-swieq (OKS).