Evalwazzjoni Interim tal-Metodu Miftuħ ta’ Koordinazzjoni (MMK) għall-Iżvilupp Sostenibbli tal-Akkwakultura tal-UE

Dan id-Dokument ta’ Ħidma tal-Persunal (SWD) jippreżenta r-riżultati tal-evalwazzjoni interim tal-Metodu Miftuħ ta’ Koordinazzjoni (MMK) għall-iżvilupp sostenibbli tal-Akkwakultura tal-UE.  Huwa bbażat fuq rapport ta’ evalwazzjoni indipendenti mħejji minn konsulenti esterni, kif ukoll fuq sorsi oħra ta’ evidenza, fost l-oħrajn ir- “Rapport Ekonomiku tas-settur tal-Akkwakultura tal-UE” (STECF-18–19) u r-Rapport tal-2018 dwar is-Suq tal-Ħut tal-UE. L-għan tal-evalwazzjoni huwa li (i) tivvaluta l-isforzi nazzjonali u tal-UE biex tippromwovi l-iżvilupp ta’ akkwakultura sostenibbli fir-rigward tal-objettivi tal-MMK f’termini tal-effettività, l-effiċjenza, ir-rilevanza, il-koerenza u l-valur miżjud tal-UE tagħhom; (II) tinforma lill-Istati Membri, lill-partijiet ikkonċernati u lill-pubbliku dwar il-kisbiet tal-MMK f’dan is-settur; (III) tipprovdi evidenza għat-tfassil tal-politika futura dwar l-akkwakultura tal-UE. L-evalwazzjoni għandha l-għan li tidentifika l-fatturi li kkontribwew għas-suċċess jew il-falliment tal-implimentazzjoni tal-MMK s’issa u li jistgħu jikkontribwixxu għall-iżvilupp ulterjuri ta’ politika bbażata fuq l-evidenza għall-iżvilupp sostenibbli tal-akkwakultura tal-UE.