Studju dwar l-istabbiliment ta’ qafas għall-ipproċessar u l-analiżi tad-data ekonomika marittima fl-Ewropa

Dan l-Istudju ġie wara sensiela twila ta’ studji li ppruvaw jiddefinixxu u jkejlu l-ekonomija blu fl-UE. Dawn ipprovdew xi informazzjoni kwalitattiva, iżda fil-biċċa l-kbira saħħew dak li diġà kien magħruf mill-ewwel studju tal-2009, jiġifieri li l-organizzazzjonijiet nazzjonali tal-istatistika jsibuha bi tqila jew ma jistgħux jipprovdu informazzjoni aktar dettaljata milli diġà jipprovdu lill-Kummissjoni. Għalhekk, il-Kummissjoni bdiet tagħmel il-kalkoli tagħha stess, abbażi tal-istudji msemmija hawn fuq, kif ukoll data disponibbli għall-pubbliku bħall-Istatistika Strutturali tan-Negozju (SBS), it-tabelli input-output, l-istatistika tat-turiżmu, il-Qafas tal-Ġbir tad-Data għas-Sajd u l-Istħarriġ dwar il-Forza tax-Xogħol. Dan l-istudju kellu l-għan li jagħmel kontroverifika ta’ dawn in-numri u jipprovdi dettalji addizzjonali minn sorsi oħra.