Komunikazzjoni mill-Kummissjoni: Linji Gwida għall-għajnuna mill-Istat fis-settur tas-sajd u l-akkwakultura

Dawn il-linji gwida riveduti jipprovdu qafas għall-Istati Membri dwar kif ifasslu u jimplimentaw miżuri ta’ għajnuna mill-Istat fis-settur tas-sajd u tal-akkwakultura, biex jilħqu l-miri ekoloġiċi ambizzjużi tal-UE billi jtejbu l-effiċjenza enerġetika u jtaffu l-effett tat-tibdil fil-klima, mingħajr distorsjonijiet bla bżonn tal-kompetizzjoni fis-Suq Uniku. B’mod ġenerali, għandhom l-għan li jallinjaw l-għajnuna mill-Istat mal-objettivi tal-Politika Komuni tas-Sajd (PKS), speċjalment għal dak li jikkonċerna l-Fond Ewropew għall-Affarijiet Marittimi, is-Sajd u l-Akkwakultura (FEMSA) il-ġdid, u l-Patt Ekoloġiku Ewropew, filwaqt li jippromwovu s-sostenibbiltà ambjentali, ekonomika u soċjali fis-settur.