Proposta għal Rakkomandazzjoni tal-Kunsill dwar it-tisħiħ tal-azzjonijiet tal-UE għall-ġlieda kontra r-reżistenza għall-antimikrobiċi f’approċċ “Saħħa Waħda”

Fl-2019, l-Organizzazzjoni Dinjija tas-Saħħa (WHO) iddikjarat ir-reżistenza għall-antimikrobiċi (AMR) bħala waħda mill-aqwa 10 theddid globali għas-saħħa pubblika li qed tiffaċċja l-umanità. F’Lulju 2022, il-Kummissjoni, flimkien mal-Istati Membri, identifikat l-AMR bħala waħda mit-tliet theddidiet ewlenin għas-saħħa prijoritarji fl-UE. 

Mill-adozzjoni tal-Pjan ta’ Azzjoni dwar l-AMR tal-2017, xi inizjattivi ewlenin ikkontribwew għat-tisħiħ ulterjuri tar-rispons tal-UE għall-AMR. Dawn jinkludu inter alia l-Approċċ Strateġiku għall-Farmaċewtiċi fl-Ambjent, l-Istrateġija mill-Għalqa sal-Platt u l-Pjan ta’ Azzjoni ta’ Tniġġis Żero għall-Ilma, l-Arja u l-Ħamrija, ir-Regolament (UE) 2019/6 tal-Parlament Ewropew u tal-Kunsill u r-Regolament (UE) 2019/4 tal-Parlament Ewropew u tal-Kunsill, id-Deċiżjoni ta’ Implimentazzjoni tal-Kummissjoni (UE) 2020/1729 u l-Istrateġija Farmaċewtika.
Din il-proposta
tal-Kummissjoni għal Rakkomandazzjoni tal-Kunsill dwar l-AMR tinkludi objettivi li huma konsistenti mal-miżuri eżistenti fil-qasam ta’ politika, b’mod partikolari mal-Pjan ta’ Azzjoni dwar l-AMR tal-2017, u ma’ politiki oħra tal-Unjoni, b’mod partikolari l-politika agrikola komuni.