Feirmeoireacht aigéan athghiniúnach i Réigiún Mhuir Bhailt — Tionscadail shuaitheanta réigiúnacha lena dtacaítear leis an ngeilleagar gorm inbhuanaithe in imchuacha farraige an Aontais (EMFAF-2023-PIA-FLAGSHIP)

Mar shampla nithiúil d’athchóiriú éiceachórais, is é is aidhm don topaic seo iascairí a atreorú ó ghníomhaíochtaí eastósctha go gníomhaíochtaí athghiniúna aigéin. Tacóidh sé le hiascairí agus le páirtithe leasmhara eile measúnú a dhéanamh ar an leas agus ar an indéantacht a bhaineann le feirmeacha aigéin athghiniúnacha nua a bhunú nó éiceachórais mhuirí chósta a athbhunú, lena n-áirítear trí thástáil a dhéanamh ar na cuir chuige sin, más féidir, i ndáil le limistéir mhuirí faoi chosaint. 
I gcomhréir leis na Treoirlínte Straitéiseacha maidir le Dobharshaothrú AE atá Níos Inbhuanaithe agus Níos Iomaíche, is iad seo a leanas na príomhthéamaí nach mór aghaidh a thabhairt orthu:

• Cruthú eolais agus comhroinnt agus cur chun cinn cur chuige nuálach maidir le feirmeoireacht aigéin athghiniúnach, lena n-áirítear gnéithe teicniúla, eacnamaíocha, comhshaoil agus sóisialta a bhaineann leis an bpróiseas atreoraithe;
• Scileanna agus riachtanais oiliúna a shainaithint;
• Rochtain ar spás agus ar uisce, go háirithe i dtaca le limistéir mhuirí faoi chosaint;
• Próisis cheadaithe agus údaraithe chun feirmeacha aigéin athghiniúnacha nua a shuiteáil;
• Gníomhaíochtaí taispeána chun feirmeoireacht aigéin athghiniúnach a shocrú agus a oibriú.

Ba cheart go ndíreodh na tograí ar chothabháil post agus ar chruthú post do phobail áitiúla, ar riachtanais athscilithe agus ar dheiseanna gnó a fhorbairt amach anseo a chruthóidh breisluach agus éiceachórais mhuirí á n-athghiniúint ag an am céanna.