Teachtaireacht ón gCoimisiún maidir leis an méid seo a leanas: “Sábháilteacht mhuirí: i gcroílár na loingseoireachta glaine nua-aimseartha”

Tá sé beartaithe ag an gCoimisiún athbhreithniú a dhéanamh ar chúig phíosa reachtaíochta chun rialacha an Aontais maidir le sábháilteacht agus inbhuanaitheacht mhuirí a nuachóiriú agus uirlisí a chur ar fáil don Aontas chun tacú le loingseoireacht ghlan nua-aimseartha. Is é an aidhm atá ann a chinntiú go bhfuil earnáil mhuirí an Aontais oiriúnach dá feidhm. I dteannta a chéile, is iad na tograí sin is bonn leis na hiarrachtaí chun trácht agus iompar muirí éifeachtúil, inbhuanaithe agus sábháilte a áirithiú in uiscí an Aontais agus níos faide i gcéin, ar mhaithe leis na saoránaigh, pobail chósta, an comhshaol muirí agus aigéin shláintiúla. I gcomhthráth leis an gcreat dlíthiúil láidir sin, tá an tAontas tiomanta d’oibriú laistigh den Eagraíocht Mhuirí Idirnáisiúnta (IMO) chun an barr feabhais a leagan síos maidir le cúrsaí sábháilteachta agus slándála, digitiú, agus glasú agus dícharbónú na loingseoireachta.