Straitéis maidir le forbairt inbhuanaithe dhobharshaothrú na Meánmhara agus na Mara Duibhe

Sa Mheánmhuir agus sa Mhuir Dhubh, athdhearbhaíodh roinnt uaireanta an gá atá le fás gorm a chur chun cinn agus dobharshaothrú inbhuanaithe a fhorbairt chun slándáil bia a áirithiú. Ag aithint dó an treocht sin atá ag dul i méid agus i gcomhréir lena shainordú, ghlac an Coimisiún Ginearálta Iascaigh don Mheánmhuir Rún CGIM/41/2017/1 le déanaí maidir le straitéis le haghaidh forbairt inbhuanaithe dhobharshaothrú na Meánmhara agus na Mara Duibhe. Forbraíodh an straitéis réigiúnach sin mar chuid de phróiseas forleathan comhairliúcháin. Beartaítear leis todhchaí do dhobharshaothrú na Meánmhara agus na Mara Duibhe ina mbainfear cothroime iomaíochta amach agus ina n-áiritheofar cur chun cinn na hearnála ionas go mbeidh sí níos iomaíche, níos inbhuanaithe, níos táirgiúla, níos brabúsaí agus níos cothroime. Táthar ag súil go gcuideoidh sé le bruachthíortha na Meánmhara agus na Mara Duibhe gníomhaíochtaí comhchuibhithe dobharshaothraithe agus pleananna gníomhaíochta comhchuibhithe a cheapadh, agus aird ar leith á tabhairt ar thosaíochtaí agus sainiúlachtaí reatha ar an leibhéal áitiúil, náisiúnta, foréigiúnach agus réigiúnach. Bunaithe ar thrí sprioc agus ar aschur agus gníomhaíochtaí gaolmhara, cuirfear an straitéis chun feidhme mar chuid de phróiseas atá comhsheasmhach le straitéisí dobharshaothraithe náisiúnta agus fornáisiúnta i mbruachthíortha na Meánmhara agus na Mara Duibhe.
Sprioc 1: Creat rialála agus riaracháin éifeachtúil a thógáil chun forbairt dobharshaothraithe inbhuanaithe a áirithiú;
Sprioc 2: Idirghníomhaíochtaí idir dobharshaothrú agus an comhshaol a fheabhsú agus sláinte agus leas ainmhithe á n-áirithiú ag an am céanna; agus
Sprioc 3: Dobharshaothrú margadh-dhírithe a éascú agus dearcadh an phobail a fheabhsú.