Proposta għal Regolament tal-Parlament Ewropew u tal-Kunsill dwar il-protezzjoni tal-annimali waqt it-trasport u operazzjonijiet relatati, li jemenda r-Regolament tal-Kunsill (KE) Nru 1255/97 u li jħassar ir-Regolament tal-Kunsill (KE) Nru 1/2005

Fil-kuntest tal-Istrateġija mill-Għalqa sal-Platt, il-Kummissjoni ħabbret l-intenzjoni tagħha li tirrevedi l-leġiżlazzjoni tal-UE dwar il-benesseri tal-annimali, inkluż dwar il-benesseri tal-annimali matul it-trasport. L-Anness II ta’ din il-proposta għal regolament jipprovdi kundizzjonijiet speċifiċi għat-trasport ta’ annimali akkwatiċi fl-UE. B’mod partikolari, l-anness jiffoka fuq il-kundizzjonijiet relatati ma’: I) id-disinn u l-manutenzjoni tal-mezzi tat-trasport; II) l-immaniġġar; III) l-ilma; IV) l-idoneità għat-trasport; V) il-prattiki tat-tagħbija; VI) matul it-trasport; VII) prattiki tal-ħatt; u viii) prattiki ta’ wara t-trasport.