Tuarascáil ón gCoimisiún chuig Parlaimint na hEorpa agus chuig an gComhairle maidir leis an gComhchóras Faireacháin agus Meastóireachta a chur chun feidhme le haghaidh an Chiste Eorpaigh Mhuirí agus Iascaigh

Leis an gCiste Eorpach Muirí agus Iascaigh (CEMI), tacaíodh le beartais mhuirí agus iascaigh an Aontais ó 2014 go 2020. Cuireadh comhchóras faireacháin agus meastóireachta (CMES) ar bun chun faireachán a dhéanamh ar a oibríochtaí a mhaoinítear faoi bhainistíocht chomhroinnte, agus chun a bhfuil bainte amach acu a thaifeadadh agus a rianú. Is í seo an dara tuarascáil maidir le cur chun feidhme CMES. Dírítear inti ar na forbairtí ó bhí an tuarascáil roimhe sin ann, leagtar amach inti na ceachtanna a foghlaimíodh le linn an chur chun feidhme, agus féachtar ar an gcaoi ar cuireadh iad sin san áireamh agus an creat á fhorbairt le haghaidh an Chiste Eorpaigh Mhuirí, Iascaigh agus Dobharshaothraithe (CEMID) i gcomhair na tréimhse 2021 go 2027.