Il-Patt Ekoloġiku Ewropew

Il-Patt Ekoloġiku Ewropew għandu l-għan li jittrasforma l-UE f’soċjetà ġusta u prospera, b’ekonomija moderna, effiċjenti fir-riżorsi u kompetittiva fejn ma jkunx hemm emissjonijiet netti ta’ gassijiet serra fl-2050 u fejn it-tkabbir ekonomiku jkun diżakkoppjat mill-użu tar-riżorsi. Għalhekk jistabbilixxi pjan direzzjonali tal-politiki u l-miżuri ewlenin meħtieġa biex tinkiseb din it-tranżizzjoni ekoloġika. Uħud mill-objettivi ewlenin tal-Patt Ekoloġiku jinkludu l-istimolu tal-ekonomija u l-ħolqien tal-impjiegi filwaqt li titħaffef it-tranżizzjoni; it-tfassil ta’ sistema tal-ikel ġusta, tajba għas-saħħa u favur l-ambjent; u l-preservazzjoni u r-restawr tal-ekosistemi u l-bijodiversità.  Barra minn hekk, il-Patt Ekoloġiku jirrikonoxxi l-potenzjal tal-frott tal-baħar imrobbi bħala sors ta’ proteina għall-ikel u l-għalf b’impronta b’livell baxx ta’ emissjonijiet tal-karbonju, li jispjega l-adozzjoni tal-linji gwida strateġiċi l-ġodda tal-2021 dwar l-akkwakultura. Tabilħaqq, is-settur għandu rwol ewlieni fit-tranżizzjoni ekoloġika u għalhekk għandu jkompli jikber, bl-akbar potenzjal tiegħu li jikkontribwixxi għat-tnaqqis tal-emissjonijiet tal-karbonju, it-tranżizzjoni lejn sistemi tal-ikel aktar sostenibbli, it-treġġigħ lura tat-telf tal-bijodiversità, it-tnaqqis tat-tniġġis, u l-ħolqien ta’ impjiegi fil-komunitajiet kostali u rurali.