An Comhaontú Glas don Eoraip

Is é is aidhm don Chomhaontú Glas don Eoraip sochaí chothrom rathúil a dhéanamh den Aontas, ina mbeidh geilleagar nua-aimseartha iomaíoch atá tíosach ar acmhainní agus nach mbeidh aon ghlanastaíochtaí gás ceaptha teasa ann faoi 2050, agus ina mbeidh an fás eacnamaíoch díchúpláilte feasta ó úsáid acmhainní. Dá bhrí sin, leagtar síos ann treochlár de na príomhbheartais agus na príomhbhearta is gá chun an t-aistriú glas sin a bhaint amach. I measc phríomhchuspóirí an Chomhaontaithe Ghlais tá spreagadh an gheilleagair agus cruthú post agus dlús á chur leis an aistriú ag an am céanna; córas bia atá cothrom, sláintiúil agus neamhdhíobhálach don chomhshaol a dhearadh; agus éiceachórais agus bithéagsúlacht a chaomhnú agus a athbhunú.  Ina theannta sin, aithnítear sa Chomhaontú Glas an acmhainneacht a bhaineann le bia mara feirmshaothraithe mar fhoinse próitéine le haghaidh bia agus beatha a bhfuil lorg ísealcharbóin acu, rud a mhíníonn glacadh threoirlínte straitéiseacha nua 2021 maidir le dobharshaothrú. Go deimhin, tá ról lárnach ag an earnáil san aistriú glas agus, dá bhrí sin, ba cheart di leanúint de bheith ag fás, agus an acmhainneacht is mó aici rannchuidiú le hastaíochtaí carbóin a laghdú, aistriú chuig córais bhia níos inbhuanaithe, cailliúint na bithéagsúlachta a aisiompú, truailliú a laghdú, agus poist a chruthú i bpobail chósta agus tuaithe.