Cur chuige nua maidir le geilleagar gorm inbhuanaithe san Aontas — Geilleagar Gorm an Aontais a chlaochlú ar mhaithe le todhchaí inbhuanaithe

Tá geilleagar gorm an Aontais, lena n-áirítear earnálacha amhail an t-iascach, an dobharshaothrú, an turasóireacht chósta, an t-iompar muirí, gníomhaíochtaí calafoirt agus an longthógáil, fíor-riachtanach chun cuspóirí comhshaoil agus aeráide an Aontais a bhaint amach agus, dá bhrí sin, tá ról lárnach aige maidir le haistriú glas an Aontais a chur chun cinn. Sin é an fáth a gcloíonn an cur chuige nua maidir le geilleagar gorm inbhuanaithe san Aontas leis an gComhaontú Glas don Eoraip, lena gcomhtháthaítear beartas na n-aigéan i mbeartas eacnamaíoch nua na hEorpa. Leagtar amach sa chur chuige clár oibre mionsonraithe réalaíoch chun go mbeidh ról tábhachtach ag an ngeilleagar gorm maidir le cuspóirí an Chomhaontaithe Ghlais don Eoraip a bhaint amach. Fógraítear ann freisin roinnt tionscnamh nua agus déantar cur síos ar chuid de na huirlisí agus na cumasóirí chun an t-aistriú a bhaint amach.