Rapport mill-Kummissjoni dwar il-kontrolli uffiċjali fl-Istati Membri (2019–2020) biex tiġi żgurata l-applikazzjoni tal-liġi dwar l-ikel, l-għalf, is-saħħa u l-benesseri tal-annimali, is-saħħa tal-pjanti u l-protezzjoni tagħhom.

Dan ir-rapport ikopri l-operat ġenerali tal-kontrolli uffiċjali tal-pajjiżi tal-UE u l-attivitajiet ta’ kontroll tal-Kummissjoni mwettqa fl-2019 u fl-2020 biex jiġi żgurat livell għoli ta’ protezzjoni tas-saħħa u fiduċja fil-katina alimentari, mill-għalqa sal-platt. Dawn il-kontrolli u l-awditi huma importanti biex jiġi vverifikat li n-negozji qegħdin jikkonformaw mar-rekwiżiti ġuridiċi u biex il-konsumaturi Ewropej ikunu jistgħu jkunu fiduċjużi li l-ikel li jikkonsmaw huwa sikur. Dawn huma wkoll kruċjali biex jippermettu l-operat bla xkiel ta’ kummerċ sikur fl-ikel, l-annimali u l-pjanti, kemm fl-UE kif ukoll ma’ pajjiżi mhux tal-UE.