Moladh maidir le Luachanna Dobharshaothraithe

In 2018, bhí AE-28 sa 6ú háit sna 15 thír táirgthe iascaigh is mó ar domhan, agus táirgeadh iomlán 6.6 milliún tona acu. Tá an seasamh sin bunaithe go príomha ar ghabhálacha na hearnála iascaireachta tráchtála, áit a bhfuil an rangú céanna ag AE-28, le 5.3 milliún tona san iomlán, arbh ionann é agus 5.48 % den ghabháil dhomhanda. Maidir le táirgeadh dobharshaothraithe, thuairiscigh AE-28 1.3 milliún tona san iomlán, arbh ionann é agus 1.15 % den táirgeadh dobharshaothraithe domhanda. D’allmhairigh na 28 mBallstát 9.4 tona de tháirgí iascaigh agus dobharshaothraithe ó thríú tíortha in 2018 agus d’onnmhairigh siad 2.2 milliún tona, ag sroicheadh tomhaltas dealraitheach 12.5 milliún tona in aghaidh na bliana, as ar tháinig 3.2 milliún tona ón dobharshaothrú. Léiríonn na sonraí le haghaidh 2018 gur allmhairigh AE-28 2.1 milliún tona de tháirgí dobharshaothraithe agus gur onnmhairigh siad 0.21 milliún tona. Léiríonn na figiúirí sin nach bhfuil ach 1.1 milliún tona de tháirgeadh dobharshaothraithe AE-28 á thomhailt ag tomhaltóirí an Aontais, arb ionann é agus 34.25 % de thomhaltas dealraitheach na dtáirgí dobharshaothraithe. 
Le 25 bliana anuas, tháinig méadú ar mhéid na táirgeachta dobharshaothraithe (beomheáchan) ar fud an domhain ag meánráta fáis 5.9 % in aghaidh na bliana, agus in AE-28, ba ráta scoite 0.61 % in aghaidh na bliana a bhí sa ráta fáis. Tugadh aghaidh roinnt uaireanta ar na cúiseanna leis an bhfás measartha sin i ndoiciméid oifigiúla an Aontais, amhail Treoirlínte Straitéiseacha maidir le forbairt inbhuanaithe dhobharshaothrú AE (2013), a athbhreithníodh le déanaí le sraith struchtúrtha agus chomhsheasmhach moltaí i dTreoirlínte straitéiseacha maidir le dobharshaothrú AE níos inbhuanaithe agus níos iomaíche don tréimhse 2021 go 2030 (2021). 
Sainaithníodh dobharshaothrú inbhuanaithe freisin mar rannchuiditheoir tábhachtach chun an t-aistriú chuig córas bia inbhuanaithe a bhfuil lorg íseal comhshaoil agus slabhraí soláthair gairide aige a éascú. Sa Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún a foilsíodh le déanaí maidir le cur chuige nua i leith geilleagar gorm inbhuanaithe san Aontas, Geilleagar Gorm an Aontais a chlaochlú ar mhaithe le Todhchaí Inbhuanaithe (2021), aithnítear an méid seo a leanas: ‘Comhlíonann dobharshaothrú an Aontais ardchaighdeáin maidir le cáilíocht táirgí agus sláinte ainmhithe, ach tá lamháil ann fós chun feabhas a chur ar éagsúlú, ar iomaíochas agus ar fheidhmíocht chomhshaoil. Is féidir le dobharshaothrú ísealtionchair (amhail dobharshaothrú ísealtrófach, iltrófach agus orgánach), agus seirbhísí comhshaoil ón dobharshaothrú, má dhéantar tuilleadh forbartha orthu, rannchuidiú go mór leis an gComhaontú Glas don Eoraip, leis an straitéis ‘ón bhfeirm go dtí an forc’ agus le geilleagar gorm inbhuanaithe.’
Is fiú a lua go bhfuil an dobharshaothrú thar a bheith éagsúil ó thaobh speiceas, ceanglais chomhshaoil, teicneolaíochtaí, bonneagar sonrach agus suíomh sonrach de. I gcodarsnacht le brainsí feirmeoireachta ainmhithe eile, nach bhfuil dírithe ach ar speiceas amháin in aghaidh an speicis, braitheann dobharshaothrú domhanda ar 466 speiceas aonair agus 156 ghrúpa speiceas eile ar an ngéineas, ar an bhfine nó ar leibhéal tacsanomaíoch níos airde, lena n-áirítear hibridí éisc eite idirshonracha. Ní mór aghaidh a thabhairt ar an gcastacht
sin níos minice nuair a bhíonn díospóireachtaí agus ráitis a bhaineann leis an dobharshaothrú i gceist, bíodh sin go dearfach nó go diúltach. Is fiú a thabhairt faoi deara freisin gur tháinig athrú ar chuid de luachanna an dobharshaothraithe le linn stair fhada na hearnála, luachanna eile a chuir in aghaidh taighde eolaíoch nó ar dheimhnigh taighde eolaíoch iad, agus déantar luachanna nua a fhiosrú agus a phlé. Níl sé i gceist leis an moladh
seo liosta uileghabhálach de luachanna a bhaineann le dobharshaothrú an Aontais a chur ar fáil, ach léirítear leis rannpháirtíocht feirmeoirí dobharshaothraithe agus grúpaí eile ón tsochaí maidir le roinnt saincheisteanna a bhaineann le gníomhaíocht dobharshaothraithe.