Perspettiva transkulturali dwar l-impatt tal-indikazzjonijiet dwar is-saħħa u n-nutrizzjoni, il-pajjiż tal-oriġini u l-ekotikketta fuq l-għażla tal-konsumatur ta’ prodotti ġodda tal-akkwakultura

Matul l-aħħar għaxar snin, għadd dejjem akbar ta’ prodotti ġodda tal-akkwakultura b’valur miżjud għamlu posthom fis-suq Ewropew, bħala rispons għad-domanda dejjem tikber għal dieta aktar tajba għas-saħħa, u sorsi ta’ proteini aktar sostenibbli u prodotti lokalment. L-importanza ta’ dawn il-fatturi tal-għażla tal-konsumatur għall-aċċettazzjoni tal-prodotti tal-akkwakultura twitti t-triq għal riorjentazzjoni rilevanti tal-industrija tal-akkwakultura Ewropea lejn approċċ aktar iffukat fuq il-konsumatur. Din ir-riċerka tuża esperimenti b’għażla diskreta biex teżamina l-effett tal-indikazzjonijiet dwar is-saħħa u n-nutrizzjoni, il-pajjiż tal-oriġini (COO), u l-ekotikketti fuq l-għażla tal-konsumatur ta’ prodotti ġodda tal-akkwakultura f’kuntest transkulturali. Għall-istudju ntgħażlu tliet prodotti b’metodi differenti ta’ preservazzjoni: prodott frisk (imkessaħ), fil-laned, u affumikat. Ir-riżultati jindikaw li t-tikketta COO “prodotta fil-pajjiż proprju” flimkien mal-ekotikketta tal-ASC jiffunzjonaw aħjar mill-indikazzjonijiet dwar is-saħħa u n-nutrizzjoni bħala xprun tal-għażla. Ir-riżultati jindikaw ukoll l-eżistenza ta’ segmenti differenti ta’ konsumaturi “konxji dwar in-nutrizzjoni”, “etnoċentriċi”, “konxji mill-prezz”, u “ekokonxji”.