Il-benessri tal-ħut imrobbi, Prattiki komuni matul it-trasport u waqt il-qatla

L-għan ta’ dan l-istudju kien li tinġabar informazzjoni dwar il-prattiki attwali tal-benessri tal-annimali fl-akkwakultura Ewropea fir-rigward tat-trasport u t-tbiċċir ta’ ħut imrobbi, u li jiġi analizzat kemm il-kwistjonijiet dwar il-benessri tal-ħut għadhom mhux solvuti. Tqiesu l-ispejjeż biex jintużaw prattiki tajbin tat-trattament għall-benessri, il-qagħda ekonomika, l-effetti fuq il-kompetittività u fatturi oħra. Il-perjodu ta’ referenza kienu s-snin 2009–2013. L-istudju ffoka fuq il-ħames speċijiet ewlenin ta’ ħut imrobbi biex jipprovdi preżentazzjoni ġenerali tas-sitwazzjoni attwali fl-akkwakultura Ewropea: Is-salamun (tal-ilma baħar kiesaħ); karpjun komuni u trota qawsalla (ilma ħelu), u; L-ispnott u l-awrat (il-baħar Mediterran). L-istandards internazzjonali tal-Organizzazzjoni Dinjija għas-Saħħa tal-Annimali (OIE) dwar it-trattament xieraq tal-annimali waqt it-trasport u l-isturdament u l-qtil ta’ ħut imrobbi għall-konsum mill-bniedem intużaw bħala punt ta’ riferiment għall-valutazzjoni tal-prattiki tal-benessri. Tqisu wkoll ir-rakkomandazzjonijiet tal-EFSA dwar it-tbiċċir.